Endrit KAPAJ, LLM

1-Aksidentet rrugore, Shqipëria në gjendje lufte.

Muaji prill, shënoi mjaft aksidente me pasoja të rënda, duke përfshirë edhe humbje jete. Aksidenti tragjik i ndodhur në aksin rrugor Plepa-Rrogozhinë, ku humbën jetën dy fëmijë, si pasojë e prerjes së barrierave mbrojtëse të rrugës, shërbeu për të rikthyer vëmendjen e publikut tek siguria e qarkullimit në rrugë dhe sinjalistika rrugore. Në programin e Qeverisë Shqiptare 2013–2017, për sa i përket qarkullimit dhe sigurisë rrugore theksohet “..Rritja e sigurisë rrugore përbën gjithashtu një prioritet madhor. Kjo do të realizohet në tri ndërhyrje kryesore:

-në drejtim të përfundimit të veprave të papërfunduara sipas standardeve si dhe eliminimit të pikave të zeza të aksidenteve;

-forcimit të rregullave të qarkullimit rrugor dhe zbatimit të tyre pa kompromis;

-si dhe një fushate ndërgjegjësuese e edukative që fillon në bankat e shkollës.

Numri i aksidenteve rrugore synohet të ulet në masën 20%, vetëm gjatë vitit të parë të këtij mandati qeverisës.[1]

Megjithatë, statistikat tregojnë një situatë tejet të përkeqësuar. Referuar INSTAT [2]përgjatë viteve të mandatit qeverisës, aksidentet rrugore jo vetëm që nuk janë ulur, por përkundrazi janë rritur. Për më në detaje tabela më poshtë:

E shprehur grafikisht tabela do të shfaqte këtë panorame:

Trendi rritës i aksidenteve nuk po ndalet, por kjo fatkeqësisht po shoqëron edhe rritjen e pasojave në jetë njerëzore. Mund të themi lirisht se politikat e qeverisë në këtë drejtim kanë dështuar dhe për këtë nuk mjafton vetëm kërkesa për dorëheqje ndaj Ministrit Haxhinasto, por një përgjegjësi tërësore e kësaj mazhorance si një premtim i pa mbajtur.

2-Porti i Durrësit, shteti dorëzim pa kushte tek koncesionarët.

Porti më i madh i vendit, prej kohësh lëngon nga situata problematike e krijuar ndërmjet shoqërisë koncesionare te Terminalit Lindor dhe shoqërive te tjera të licencuara që kryejnë veprimtarinë e ngarkim shkarkimit të anijeve. Kjo situatë problematike është shoqëruar me bllokim te anijeve në Port, duke rënduar financiarisht klientët dhe duke i detyruar ata jo vetëm që të mendojnë, por tashmë të zgjedhin porte të tjera të vendeve fqinje.

Gjatë këtij viti dhe atij në vazhdim në Portin e Durrësit do të shkarkohen tubat, të cilat do të instalohen për projektin TAP. Projekt, i cili konsiderohet madhor për ekonominë e vendit tonë, por duket se përfitimi i buxhetit të shtetit nga kryerja e këtij operacioni do të jetë minimal, për të mos thënë simbolik. E drejta për kryerjen e operacionit të shkarkimit te tubave të projektit TAP i është dhënë shoqërisë koncesionare EMS APO. Por ku qëndron problemi?

Autoriteti Portual Durrës zotëron të gjitha kapacitetet operacionale, njerëzore dhe teknike, për ta kryer këtë operacion në Terminalin nën administrimin e saj, duke angazhuar shoqëritë e licencuara të ngarkim-shkarkimit, por duket se interesi i autoritetit drejtues të APD ka qenë që këtë operacion ta kryej koncesionari. Për këtë qëllim, shoqëria TAP është orientuar dhe këshilluar që operacionin ta kryejë nëpërmjet koncesionarit. Duket mjaft e dyshimtë që ky veprim nga ana e Drejtorit te APD të jetë kryer nisur nga interesi i cilësisë më të lartë, pasi siç e theksuam më lart APD zotëron te gjitha asetet e specializuara për përpunimin e mallrave të përgjithshme, ku hyjnë edhe tubat. Dyshimi bëhet edhe më i madh nëse analizon aspektin financiar të këtij operacioni, konkretisht: nëse operacioni do të kryhej në Terminalin nën administrim dhe menaxhim të saj APD do të përfitonte 55% të tarifës së shkarkimit, ndërkohë që tashmë ajo do të përfitojë vetëm 11% të tarifës. Faktet e mësipërme meritojnë vëmendjen e institucioneve përgjegjëse, veçanërisht të Kontrollit të Lartë të Shtetit.

[1] Qarkullimi dhe siguria rrugore http://www.transporti.gov.al/al/publikime/qarkullimi-dhe-siguria-rrugore/qarkullimi-dhe-siguria-rrugore

[2] Aksidente në Shqipëri http://www.instat.gov.al/al/themes/transporti.aspx

Ndaje raportin me miqtë në:

Facebook

Twitter

Linkedin