Politika e Jashtme | Maj – Qershor 2017

Sokol KONDI, MSc

Kush e këshillon ministrin?

Në një dokument të publikuar nga vetë Ministria e Punëve të Jashtme, i cili duket se ka shërbyer për përdorim të brendshëm, lidhur me me nëpunësit e këtij institucioni që kanë detyrim deklarimin e pasurisë, bie në sy një fenomen interesant.

Edhe pse në tabele shfqen emra drejtorësh dhe drejtuesish të tjerë të lartë, që mbajnë plot grada diplomatike dhe kanë mbi supe shume vite karrierë, ministri ka zgjedhur që pavarësisht kësaj, njerëzit e tij më të ngushtë, pra ata që do ta këshillojnë direkt mbi problematikat më të mprehta dhe të rëndësishme, të jenë njerëzit me më pak përvojë brenda Ministrisë së Punëve të Jashtme.

Ndër ta, ansjëri nuk ka gradë diplomatike, nuk ka shërbyer asnjëherë si ambasador apo nëpunës në shërbimin e jashtëm shqiptar dhe për disa syresh përvoja e parë profesionale ka qenë pikërisht ajo e Këshilltarit të Ministrit të Punëve të Jashtme të Republikës së Shqipërisë.

Për dy vite me radhe, për të dhënë një shembull, ministri Bushati është këshilluar nga Ravesa Lleshi, të cilën më pas e ngarkoi me punë si përfaqësuesja e Shqipërisë pranë OSBE-së.

Këshilltarja në fjalë, sikurse e ka pohuar edhe vetë ministria, nuk është një diplomate karriere, megjithatë u përzgjodh (nuk dihet mbi bazën e cilit kriter) për të këshilluar përfaqësuesin më të lartë të politikës së jashtme shqiptare pas Presidentit të Republikës dhe Kryeministrit të vendit, pra Ministrin e Punëve të Jashtme, dhe si duket, pasi e ushtroi shumë mirë këtë detyrë, u shpërblye me postin e mbasadores pranë OSBE-së, edhe pse në shkelje të ligjit të propozuar nga vetë MPJ dhe të miratuar nga shumica në pushtet lidhur me shërbimin e jashtëm.

Në fakt, ish-këshilltarja nuk plotësonte as kriterin e 10 viteve përvojë në marëdhëniet me jashtë për t’u bërë ambasadore në bazë të ligjit në fjalë. Të njëjtën problematikë lidhur me mugesën e përvojës në diplomacinë e terrenit, dhe me të pasurit vetëm diplomacinë e librave shfaqin edhe këshilltarë të tjerë të ministrit si Glevin Dervishi, Enzo Shijaku dhe Kleina Kasanai.

Të gjithë nëpunësit e mësipërm, në tabelën e lartpërmendur nuk kanë të shënuar asnjë vit vjetërsi pune, në kohën kur është publikuar dokumenti dhe nuk kanë asnjë gradë diplomatike. Madje disa prej tyre e kanë bosh edhe kutizën e zërit “kualifikime” apo “gjuhë të huaja”. Jo se të jesh i ri është sinonim i të mos diturit, përkundrazi, shpeshherë ndryshimet  e mëdha dhe revolucionet vijnë nga të rinj guximtarë dhe besimplotë.

Por zor se kjo ndodh në një sferë si diplomacia, ku burrat dhe gratë me thinja, që kanë shpenzuar dekada të tëra nga jeta e tyre në kontakte dhe njohje të politikës, kulturës dhe traditeve të vendeve të ndryshme ku kanë shërbyer, janë ata të cilët janë më të përshtatshëm për t’ia dhënë ndonjë këshillë ministrit, gjithnjë nëse ky i fundit ka vërtet nevojë dhe gjithnjë nëse këshillat e vërteta të politikës së jashtme nuk i vijnë nga ndonjë “super-këshilltar” me hierarki më të lartë se ai në formë diktati.

Të vjen habi kur në tabelën në fjalë sheh emra burrash dhe grash me grada të larta diplomatike dhe shumë vite vjetërsi punë, si dhe gjuhë të shuma të folura, falë karrierës së tyre diplomatike. Ata janë lënë në detyra të rëndësishme drejtuese në ministri, megjithatë nuk janë parë të denjë si këshilltarë. Këshillat, ministri i ka preferuar nga “truri i freskët” i sapo dalë nga bankat e universiteteve.

Aq e vërtetë është kjo freski, sa që në një takim të rëndësishëm dypalësh në mjediset e MPJ ndërmjet diplomatëve të lartë grekë dhe atyre shqiptarë, përfshi edhe vetë ministrin tonë, i vetmi diplomat me thinja i MPJ-së shqiptare ishte Sekretari i Përgjithshëm, i cili gjithashtu tashmë është larguar nga godina e MPJ për të shërbyer si ambasador në një shtet të rëndësishëm. Por me siguri edhe këtë “gap”, MPJ do të dijë ta plotësojë me prurje të reja dhe të freskëta, në emër të traditës së mandatit të fundit qeverisës.

MINISTRIA E PUNËVE TË JASHTME

CV e nëpunësve që kanë detyrim deklarimin e pasurisë

Ndaje raportin me miqtë në:

Facebook

Twitter

Linkedin